කවිය යනු කුමක්ද?
ලෝකයේ බොහෝ වියතුන් කවිය පිළිබඳව බොහෝ නිර්වචනයන් කවිය උදෙසා දී ඇති නමුදු තවමත් කවිය සඳහා නිශ්චිත වූ පූර්ණ නිර්වචනයක් ඉදිරිපත් කිරීමට කිසිවෙකු සමත්ව නැත. කවිය යනු එතරම් වූ පුළුල් විෂය පථයකි. කෙසේවතුදු, කවිය ඉගෙනීමට අතපොත් තබන ඔබගේ දැනගැනීමට සහ කවිය යනු කුමක්ද යන්න සරලව තේරුම් ගැනීම උදෙසා එසේ වියතුන් ඉදිරිපත් කළ නිර්වචනයන් කිහිපයක් ගෙනහැර බලමු.
01. රසය ආත්ම කොට ගත් වාක්‍යය කාව්‍ය යයි. - විශ්වනාථ පඬිවරයා
02. රමණීයව අලුත් දෑ ප්‍රතිපාදනය කරන ශබ්දය කාව්‍යයි . - ජගන්නාථ මුනි
03. කවිය යනු අනු සාහසිකව කලා එන ප්‍රබල හැඟීම් ය. -
විලියම් හැස්වීම්
04 - කවිය වනාහි හොඳම වචන හොඳම පිළිවෙලට යෙදීම ය .
එලියට්
05. කාව්‍ය වනාහි මනුෂ්‍ය ජීවිතය පිළිබඳව සූක්ෂ්ම විවේචනයකි. කවිය මිනිසා සත්‍ය කරා ඉතා ළංකරන්නා වූ සර්ව සම්පූර්ණ භාෂණය මිස අනෙකක් නොවේ - මැතිව් අානෝල්ඩ්
06. කාව්‍ය බුද්ධිය නොව සංකල්පනය හා ප්‍රේමය දෙසට මඟ පෙන්වයි - ජී.බී. ෂෙලී
07. කාව්‍ය වනාහි මනුෂ්‍යාගේ දැනීම, අදහස්, ආශා, මනෝභාව, භාෂා ආදී හැමෙකකුම පුෂ්පය හා සුගන්ධය වන්නේ ය - කෝල්රිජ්
08. කාව්‍ය වනාහි සෑම සභ්‍යත්වයකම සෑම සමාජයකම ඒකාකාරී ප්‍රතිපත්තියක් ඇති ප්‍රසාධක කලාවකි. කාව්‍ය එක්වරම ප්‍රීතිය හා අනුශාසනාවන් ගෙන දෙයි. එය සමාජ ජීවිතයේ අලංකරණයකි. ජාතියට මහත් ගෞරව දෙන්නකි. - ශ්‍රීමත් පිලිප් සිඩ්නි
09. පරිකල්පනයන්ගේ හා මනෝභාවයන්ගේ භාෂාව වූ කලී කවියයි - විලියම් හැස්ලිට්
10. කවිය යනු මිනිස් සන්තානයේ පාරිශුද්ධිය සමඟ එක්ව ගමන් කරන සම්භාවනීය චින්තන විශේෂයකි - පී.බී. අල්විස් පෙරේරා
11. රසවත් වූ නිවැරදි වැකිය කවියයි - කුමාරතුංග මුනිදාස
මේ ආකාරයට දහස් ගණනක් නිර්වචනයන් ඔබ වෙත ගෙනහැර දැක්විය හැකි අතර එතුලින් අපට ප්‍රකටවන කරුණක් නම් කවිය යනු කුමක්දැයි තවමත් ලෝකය හඳුනාගනිමින් සිටින වගය. මෙසේ පවසන කල ආධුනික ඔබ මදක් විමතියට පත්වනු ඇත. එමෙන්ම ප්‍රවීනයැයි කියාගන්නා බොහෝ කවියන් පවසන ආකාරයට කවිය යනු මහා බරසාර දෙයක් යැයිද එය අපට නොහැකියැයිද නිගමනයකට එනු ඇත.
එය එසේ නොවන්නේමය.. කවිය වනාහී සරල සුන්දර ප්‍රකාශනයයි. ලෝකය සහ සමාජයත් එහි සිදුවන දෑ පිළිබඳව තත්ත්වාකාරයෙන් දැක ඒ පිළිබඳව සහෘදයා තුළ සබුද්ධික වූ හැගීම් ගොඩ නැංවීමට කරනු ලබන එක් සාහිත්‍ය නිර්මාණ විශේෂයක් ලෙස “කවිය” හැඳින්විය හැකි ය.
සමාජය තුල සිදුවන දෑ සමාජයට ඉහලින් සිට සමාජය වෙත යථාර්ථය පෙරටුකොට ගනිමින් සම්ප්‍රේෂණය කරන්නා සාහිත්‍යධරයා වන අතර තම නිර්මාණයන් ශබ්ධ රසය පෙරටුකොට ගනිමින් රසවත්ව ඉදිරිපත් කරන්නා කවියාය.
සෙසු සාහිත්‍ය නිර්මාණ අතරින් කවිය සුවිශේෂී වන්නේ ප්‍රතිභාපුර්ණ පරිකල්පනාව තුළින් සුවිශේෂී කාව්‍ය අලංකාර යොදාගෙන නිර්මාණය කරන බැවිනි.
කවිය පිලිබඳ සර්ව සාධාරණ නිශ්චිත අරුතක් මෙතෙක් ඉදිරිපත් වී නැත. ඉන් පකටවන්නේ කුමක්ද? එනම් කවිය පිළිබඳව නිශ්චිත අර්ථකථන ඉදිරිපත් කළ නොහැකි බවයි. සැබවින් ම කවිය යනු එක් පටු අර්ථකථනයකින් අර්ථවත් කළ නොහැකි ක්ෂේත්‍රයකි.
එහෙත් මා ඉහත ඉදිරිපත් කල මූලික අදහස් තුලින් ඔබට කවිය යනු කුමක්ද යන්න පිළිබඳව සරල නිගමනයකට එළඹිය හැකිය. එනම් කවිය යනු ලෝකයේ පවතින ඕනෑම දෙයක් වේවා, ඕනෑම සිදුවීමක් වේවා, නොඑසේනම් මිනිස් සිතෙහි හටගන්නා ඕනෑම සිතිවිල්ලක් වේවා සාමාන්‍ය මිනිසා නොදකින දෘෂ්ඨිකෝණයන්ගෙන් සමාජයේ ප්‍රගමනය හෙවත් ඉදිරි ගමනට වැඩදායක ලෙස රසවත්ව ඉදිරිපත් කිරීම වූ කලී කවියයි.
කවියක පවතින විශේෂ ගුණාංග හරහා කවියක් යනු කවරාකාර නිර්මාණයක් දැයි දළ වශයෙන් හඳුනා ගැනීමට හැකි ය. ඒ අනුව කාව්‍යාලංකාර ලක්ෂණවලින් යුක්ත වූ රසවත් හැගීම් උද්දීපනය කරනු ලබන හා ඒ මතින් ජීවන පරිඥානයක් ඇති කරනු ලබන පද්‍ය නිර්මාණය කවිය ලෙස හඳුනාගත හැකිය.
කවියා යනු කවරෙක් ද ?
ලෝකය හා සමාජය ද එහි සිදුවන දෑ ද තත්ත්වාකාරයෙන් දැක, ඒ පිලිබඳ ගැඹුරින් සිතා, තම සුවිශේෂී හැකියාවන් තුළින් රසවත්ව හා අර්ථවත්ව කාව්‍ය නිර්මාණ හරහා රසිකයාගේ වින්දනය හා දැනුම පුළුල් කරන්නේ කවියායි. කවියෙකු සැබවින්ම ලෝකය දෙස අලුතින් බලන්නෙකි. ඔහු නිතරම අලුත් වන්නෙකි. නොවටිනා දෙයකැයි සෙස්සන් විසින් අත්හරිනු ලබනු දෙයකින් පවා වටිනා අරුතක් ගෙනහැර පෑමට ඔහුට හැකියාවක් ඇත.
ඔබට කවිය යනු කුමක්ද? කවියා යනු කවරෙක්ද යන්න පිළිබඳව දළ අදහසක් මේ වනවිට ලැබෙන්නට ඇති. එසේනම් කවියට අතපොත් තබන ඔබ ආධුනික කවියෙකු කිවිඳියක ලෙස සිතට ගත යුතු වටහාගතයුතු සහ ධාරණය කරගතයුතු මූලිකම කරුණ වන්නේ ඔබ මේ සමාජය යහපත් දිශානතියකට රැගෙන යාමේ පෙරගමන්කරුවකු වීමට සූදානමින් සිටින බවය. ඒ සඳහා කවි පෙරහරෙහි කසකරුවෙකු වීමට සූදානමින් සිටින බවය. සැබවින්ම ඔබ කවියෙකි. අළුතින් සිතන්නට හැකි ඔබ හදවතෙහි කවිය නම් වූ අවිය ඇත. කළ යුත්තේ එය මුවහත් කිරීම පමණි. ඒ සඳහා ඇවැසිවන්නේ නිවැරදිව කවියක තිබිය යුතු ලක්ෂණයන් අලංකාරයන් පිළිබඳව උගෙනීම සමගින් නිරන්තර පුහුණුව හෙවත් සත්තාභ්‍යාසය පමණි. ඉඳින් අපි උගෙනිමු..........
පෙරමඟ ගමන සරසවි හා කසාදෙට
යහමඟ යවනු රිසි කිරණත උදාකොට
හරි මඟ යමින් කවියෙකු ලෙස කලාවට
හිණිමඟ තනමු අපි කවියෙන් සමාජෙට
===❤️ ජීවන සරසවිය ❤️=== ඩී .ආර්. ජගත් කුමාර===
No comments:
Post a Comment